Drief

Ora mi tabata chikito cu mi a siña landa mi no tabata kere den mi habilidad di drief
Mi tabata pensa cu si mi laga los di e floater mi lo sink y niun hende lo por hayami

“E awa ta pushabo ariba Josh”, mi juffrouw tabata keda bisami mientras mi tabata drief cu su mannan wantando mi ariba awa
Ela splicami cu entre mas salo e awa tin, mas chens un persona tin di drief

Despues di algun les, mi a cuminsa confia e ’teoria’ aki, y mi a durf di drief mi so
Tur siman mi tabata por a drief un tiki mas
Te cu a yega un dia cu mi a cuminsa landa y nunca mas kier a sali fo’i lama 

Awe mi a bay pabou, unda e beachnan sa ta yen di turista
Sin embargo, e biaha aki mi por a disfruta di un poco privacidad ‘riba awa
Mi a landa porta un kilometer, pero na un dado momento e zonido di mi man cortando den e awa a ponemi pensa ‘riba bo
Esey a ponemi stop un rato y mi a dicidi di drief

Mi a sera mi wowo y mi por a sinti e biento supla ariba e punta di mi nanishi y baha ariba mi couchi
E palabranan di mi juffrouw a resona den mi orea: “E awa ta pushabo ariba Josh”
“E awa ta pushabo ariba Josh”, mi a ripiti den bos abou
Pero na e momento ey, pensando ariba bo, e unico cos cu mi kier a haci ta sink