4AM

Zonido di fan y e tik di e holoshi:

Kerido blafon
Mi mama a contami cu ora mi a nace mi no a yora
Mas bien mi a contempla tur cos rond dimi cu wowonan hancho habri
Mescos cu mi ta contempla cada mancha ariba bo superficie ora cu mi wowonan ta mucho pisa pa sera bek


Bel di bais y harimento ariba caya den distancia:

Mi no ta considera mi mes un hende tristo
Si un hende cu ta tristo tin biaha
Pero ora mi ta tristo mi ta sinti cu tin un bashi infinito cu ta mucho hundo y ta surpasa e rango di sintimentonan cu un persona por carga su so


Un glas di awa y un pilder di drumi:

Awe mi a soña e mesun cos cu ayera y mi a lanta e mesun ora atrobe
Si mi yama cas mi mama lo preocupa
Pesey mi ta dicidi di flota ariba e nubianan shinishi cu ta zweef den mi cabes

Un buki cu nunca mi ta caba di lesa:

Mi ta sinti cu mi ta ariba un cuerde fini
Cu cada decision cu mi tuma awo lo determina e calidad di bida cu mi lo tin
Mas grandi mi bira, menos contesta tin y mas pregunta ta acomula
Mi hard drive por cu e presion?


Luz cu ta ilumina a partinan fini di mi cortina:

Blafon wak mi atrobe ta forsa yora
Pa alivia e frustracion di marduga
Pero mi no a nace ta yora y mi no por
Solo ta saliendo, mi bista ta indefini y poco poco mi no sa di nada mas