Mas cu palabra

Ora bo ta sunchi mi lomba y mi ta sera mi wowo mi no ta pega soño
Mas bien mi ta gradici shelo
Paso maske shelo a sera porta y bentana pami
No por tin maldad den e sunchinan cu bo ta dunami

Paso dia cu bo a brasami pa prome biaha mi a realisa cu e shelo ta den mi ora mi ta cubo
Y cu e nubianan ta e rosea cu bo ta supla ariba mi cama
Y e zonidonan cu ta sali for di bo boca ora bo bisami bo stimami ta tur e streyanan cu ta carga e luna

Y si ora b’a bisami bo stimami mi no ta contesta
Ta paso si mi a contesta mi pecho lo kibra
Paso e forsa di loke mi ta sinti ta mas cu cualkier palabra por expresa

Lus berde den shelo
Y olanan di cristal ariba lama blauw
Asina e ta sinti ora bo carisiami
Acaso den esey por tin maldad?

Si ora b’a pidimi pa conoce mi famia mi no a contesta
Ta paso mi ta sinti cu si mi papia duro e mundo cu mi a crea cubo lo cay
Y si e cay e lo desaparece y bira e santo cu e biento di noord oost ta carga

Ora nos ta riba nos sero di sintimento y bo mishi mi pia mi sa kico bo kier
Y sin tin biaha mi no ta mishi bo pia bek ta paso tin cosnan riba mi mente cu mi kier atende na dje

Y si mi lagabo mishi cumi curpa mi lo lubida
Paso no tin problema cu no ta soluciona su mes ora bo ta sunchi mi nek

Semper mi tabata mas fuerte cu esunnan cu a bin prome cubo
Pero acaso ora bo ta lesando e poemanan di Yakari, Lily y Rosabelle bo ta mas fuerte cumi?

Mi stimabo
Pero no pidimi pa bisabo
Paso mi stem lo kibra y mi bariga lo sink
Pesey ora mi ta caba di hacibo dimi y bo ta pega soño
Mi ta sinti un presion den mi pecho, comosifuera e murayanan ta habri y mi ta perde control di e realidad

Pero e streyanan cu ta briya den mi curpa

Nunca ta faya di cordami cu mi ta stimabo

Maske mi lipnan tin biaha ta mucho pisa pa articula

Loke palabra di tur manera nunca lo por expresa